توصيل مجاني للمشتريات بـ 60$ أو أكثر

الهيب هوب في الأردن
الهيب هوب في الأردن

الهيب هوب في الأردن

كتب في أيلول 6,2016
by Shiam Kheetan

طارق درباس ومحمد الخطيب طول عمرهم صحاب, برقصوا بريك دانس من لما كان عمرهم 13سنة. بال 2007 صاروا يتدرّبوا بشكل يومي بقاعة الرياضة بالمدرسة وبعدين اشتركوا باستديو وصاروا يتعلّموا هناك.    

 

"بالصدفة اكتشفنا شارع الثقافة، انصعقنا بكمية الأشياء اللي عم بتصير بهالمكان، عدد هائل من مغنيي الراب، فنانين غرافيتي, البيت بوكس، والبريك دانكس وصرنا نتدرّب يومين بالشارع و 3 بالاستوديو، بس ضلينا مكروهين لفترة منيحة و دايما يحكولنا إنّا مش من الشارع، احنا طلاب مدارس خاصة وتعلمنا بالاستوديو، برجوازيين مش زيهم بالشارع، ما كان في أي نوع من أنواع الانسجام بيناتنا. بعدين شوي شوي صرنا ننضم معهم، نشد ناس من عندهم معنا، هيك لصرنا معهم في فرقة شارع 962 بال 2009".

 

شارع 962 من أهم فرق الهيب هوب اللي اتشكلت بالأردن سنة 2008، كانت بتضم مغنيين راب، البيت بوكس، فنانين غرافيتي، وراقصين بريك دانس. هاي الفرقة كان مكان تجمّعها شارع الثقافة.


"بال 2010 صار أول ايفينت ل RedBull بالاردن: Red Bull Breaking. بهاد الوقت كنا انضمينا لاستوديو Freeway، اللي نظموه فريق شارع 962 وكان بضم فنانين غرافيتي، مغنيين راب، ومغنيين Beat box وصرنا جزء منه ونشارك معهم بمسابقات بالأردن وبرا.

 

بعد ما صاروا يشاركوا بمسابقات وورشات عمل بالوطن العربي و العالم، خفّ اهتمامهم بمشهد الهيب هوب بالاردن، صار اهتمامهم أكثر بالمشهد العالمي، خصوصا انه الجيل الاكبر منهم، اللي اتعلّموا منهم و بلّشوا معهم تركوا الرقص "كتييير منهم زهقوا، بطّل في شغف حقيقي زي قبل، وشافوا انه مافي عائد مالي يقدروا يعتمدوا عليه".

 

خطيب، 22 سنة، صار متعرّض ل 9 إصابات، ووصل لدرجة انه فكّروه انشلّ، صارله موقف شي 3 سنين "احنا لحد هلا منروح عالشارع، منرقص قدام الناس، ومنحاول ندرّب ونعلّم، كنّا زمان بال 2007 بحدود 30 واحد، هلّا يا دوب 9 أو 10! لساتنا لهلا مناخد مسجل منحط أغاني ومنرقص ومنحاول نشدّ الناس لجوّنا زي ما صار معنا قبل 10 سنين".

خطيب ودرباس هم الآن جزء من فرقة Middle Beast ، من أفخم فرق البريك دانس بالأردن والوطن العربي.

 

زوكا زين، أشهر وأنجح راقص هيب هوب بالأردن "الهيب هوب مش بس حركات، الهيب هوب طريقة حياة وتفكير، أنا بدون هيب هوب ما بعرف وين ممكن أكون هلا".

 

زوكا من عائلة بسيطة جدا كان من عمر 6 7 سنين يرقص بالأعراس و ينبسطوا عليه الناس، بعدين ضل يحضر فيديوهات لراقصين هيب هوب من كل العالم، ويتعلّم لحاله، لحد ما اكتشف شارع الثقافة بال 2006، "ضليت أروح أرقص هناك من 2006 لل 2008، كنا نجيب مسجل نحط أغنية و نضل نرقص على نفس الأغنية، ييجوا الشرطة ياخدونا يلففونا مشان يخوفونا، بس احنا كنا نردّ نرجع".

 

بسبب ظروف مادية صعبة اضطر يترك الجامعة 3 سنين، بس خلال هاي ال 3 سنين قرر يسافر ويتعلّم من خبرات راقصين تانيين "شاركت بمسابقات بكل تايلند وأكم بلد بآسيا، التقيت بكتير من الناس اللي كنت أحضرهم وأتعلم منهم عالانترنت ورقصت معهم، وكتير منهم فزت عليهم بمسابقات كمان!".

 

زوكا بعترف انه بوقت من الاوقات صار عنده غرور مش عادي لكن تجربة تايلند هي اللي ساعدته يتخلص منه "اكتشفت انه لسا في كتيييير أشياء ما بعرفها، الناس اللي التقيت فيهم فرجوني انه الموضوع كتيير أكبر من اني أفوز بمسابقات".

 

رجع عالأردن، كمّل دراسته، وخلّص هندسة مدنية، اشي نهائيا ما بتتوقعوه "الهندسة كانت بس مشان أمي، جبت الشهادة مشان تنبسط مني، اشتغلت فيها 3 أشهر بعدين رجعت للرقص. عمري ما كنت أرقص مشان أجيب مصاري، كنت أطلع مصاري مشان أرقص، لمّا أمي شافتني أول مرة برقص وشافت ردة فعل الجمهور، صارت تبكي، ما صدّقت انه الرقص ممكن يحققلي هالقد سعادة ونجاح".
 

من أهم مغنيين الراب من شارع الثقافة عامر الطاهر وواحد من مؤسسين فرقة شارع 962، "هاي الفرقة اجت من شغف، حب وحاجة لشرارة، لمحتوى يكون من الشارع، اشي يغيّر ويدخل التاريخ".

 

عامر عنده موهبة كتابة الشعر والنثر من لمّا كان عمره 10 سنين، وقدر يسجّل أول أغنية راب على عمر 15 سنة لمّا كان عايش مع عيلته بالسعودية.  

 

"أكثر من مرة ييجوا ناس يحكولي غيّر الكلمات، بس مستحيل أغيّر اشي، اذا أي اشي بده يطلع باسمي بده يكون حقيقي مش زي ما بدهم يسمعوا".

 

كتير ناس بحكوله أنه رح يكبر وبالتالي لازم يترك الراب على اعتبار انها هواية وبس للشباب الصغار، بس عامر برفض هاي الفكرة تماما "الكتابة والموسيقى شغفي، وبس أكبر، المحتوى تبعي بكبر معي، بس مستحيل أتخلّى عنه".

 

كل شباب الهيب هوب اللي لحد الآن مكمّلين بمجالهم بميّزهم روح مثابرة واجتهاد وطاقة خرافية! لمّا التيقنا معهم في كلمة كلهم استخدموها "Spark" يعني الشرارة، الهيب هوب عمل جوّاتهم شرارة، خلّاهم يتغيّروا، يغيّروا ويأثروا بأي مكان بروحوا عليه بالعالم.


شارع الثقافة اتعرّض لكتير انتقادات سلبية من بداية ظهور ثقافة الهيب هوب فيه تقريبا بال 2006، لكن قلال اللي لاحظوا حجم الثقافة الفخمة اللي طلعت من هذا الشارع.



Thumb
سوف يتم التأكد من كل التعليقات قبل النشر
on 18/03/2017 12:00:00 ص
بقلم shiam
للسنة الثالثة على التوالي جوبدو بتشارك بأكبر حدث للكوميكس بالوطن العربي: كوميك كون! Middle East F...

إقرأ المزيد
on 10/02/2017 12:00:00 ص
بقلم Manar_Ayoubi
بر بحر جو، آخر كولكشن من جوبدو. من البراري الشاسعة، أعماق البحار، وسابع سما منقدملكم كو...

إقرأ المزيد
on 12/01/2017 12:00:00 ص
بقلم Manar_Ayoubi
مش كل الدكاترة خطّهم بخزي. حكم الدويري على سبيل المثال، دكتور بالنهار، وفنّان بالليل. أو...

إقرأ المزيد
on 12/09/2016 12:00:00 ص
بقلم manar
150 موسيقي وموسيقية قدّموا, 50 انقبلوا, بيس, درمز, غيتارات, عود, كمان, اوكورديون والكثير الكثير م...

إقرأ المزيد

LeaveaReplay

Primary button