توصيل مجاني للمشتريات بـ 60$ أو أكثر

أفخم 3 مواقع في القدس ورام الله
أفخم 3 مواقع في القدس ورام الله

أفخم 3 مواقع في القدس ورام الله

كتب في آب 26,2016
بقلم Waad Abbas

أنا ساكنه بمنطقة نسبيا "حدودية"، اسمها كفر عقب، وهاي المنطقة ما بين القدس و رام الله، فأنا فعليا محسوبه على التنتين، لهيك راح احكي ٣ أجمل محلات بكلا المدينتين لإلي.

 

المكان الأول: ملتقى رمّانه الثقافي في رام الله التحتا (البلدة القديمة يعني)
 

حسب وصف أصحابو المؤسسين الثلاثة للملتقى (٣ شباب في آخر العشرينيات) "عبق الحجارة الأبقى، ورائحة الكتب القديمة التي نحب"، و هادا هو رمّانه. قهوة و موسيقى ببيت قديم عمره ١٠١ سنه، انبنى بسواعد صديقة و القائمين عليه اصدقاء، أسعاره مش برجوازية و قهوته العربية زاكية و ملياااااان كتب وحب و موسيقى.

 

وسهرات الرمانه لا تعوض، حطوا العمق و نقاشات الكتب و الأعمال الفنية و الأفلام الي بتفتفت مخك فتفته و اللقاءات الأدبية الثرية على جهه، السهرات هناك عالم تاني من الدفاااا و الانبساط بعيدا عن فوضى الواقع. مثلا، من أحلى السهرات كانت عزف العود لموسيقى طارق العربي طرقان (يعني اغاني سبيستون) و احنا نغني بأصوات أشنز من النشاز و نشرب شاي بنعنع و ميرامية.

 

 

 

المكان الثاني: سطوح دار ستي (المدرسة الأشرفية في القدس) في البلدة القديمه

بالنسبة لالي هو بيت ستي القديم الي فوق باب السلسلة الي شبابيكه خضر و اطلالته هي قبة الصخرة الذهبية، بس بالنسبة للعالم و التاريخ هو المدرسة الأشرفية في القدس الي انبنت عام 1470م. أحلى اشي بالنسبة إلي البوابة العملاقة على المدخل و شبابيكه الخضر و مكتبة سيدي القديمه و ابتسامه ستي. وبرضه حطو كل هاد الحكي على جهه، وادخلوا عالم تاني بعد ما تطلعوا أبو ١٠١ درجه لتوصلو للسطوح و تشوفوا قبه الصخرة و المسجد الأقصى وكنيسة الجثمانية و الهوا بلعب لعب و الحمام باجريه معلق جرس برن كل ما لف لفة حولين الميدنه وهو عم بأذن.

 
 
 

المكان الثالث: درجات باب العامود
 

باب العامود أو باب دمشق أو باب نابلس، من الأبواب الرئيسية بسور القدس إلى بتوصلنا لساحات المسجد الأقصى. بس هو حياة كاملة مش بس مدخل لمدينه مليانه. على هاد الباب و درجاته سقطوا شهداء و اعتقلوا أصدقاء و صديقات و انضربو و صار مظاهرات بس بذات الوقت هاي الدرجات شهدت دبكات عفوية عشان بنحب صوات اجرينا على أرضنا و شهدنا أمسيات موسيقية و أكلنا مشاوي وسهرنا نشرب شاي و نحكي عن الحرية.
 

 

 

 



Thumb
سوف يتم التأكد من كل التعليقات قبل النشر
Become Writer

حابب تصير تكتب على مدوّنة جوبدو؟

إقرأ المزيد
on 24/09/2016 12:00:00 ص
بقلم shiam
سيارة, سيارة, طيارة, باص, باص, طيارة, سيارة, سيارة, طيارة, طيارة, سيارة, سيارة, طيارة, باص, باص, ...

إقرأ المزيد
on 13/06/2016 12:00:00 ص
بقلم shiam
قبل فترة حسينا انه لازم نرجع نتواصل مع أصولنا في الصحاري والقفار, فحملنا حالنا واتّجهنا إلى أحلى ...

إقرأ المزيد

LeaveaReplay

Primary button